Irailean irekitzekoa den Seaskaren bosgarren kolegioarentzat izango da aurtengo dirua. Su ta Gar taldeak egingo du ikastolen festaren kantua.
Maiatzaren 14an izango da 40. Herri Urrats Senperen, eta Seaskak atzo egindako prentsaurrekoan dei egin zien euskaltzale guztiei bertan parte hartzera joateko. Aurtengo dirua Seaskaren bosgarren kolegioa laguntzeko izango da. Obrak hasiak dira, eta datorren ikasturtetik aurrera hasiko dira ikasleei harrera egiten.
<Azken urteetako urratsek zubiak eraikitzeko balio izan dute, eta lan horretan jarraitu behar dugu, zimenduak indartzen.>
Urratsak zubi izango da aurtengo Herri Urratsentzat hautatu duten leloa, eta Su ta Gar taldeak egingo du abestia. <Zubiek herria batzen dute, Hego eta Ipar Euskal Herria batzeko lan egiten du Seaskak, eta euskara eta jendartea lotzeko ere>, azaldu du Koldo Rodriguez Herri Urratseko koordinatzaileak.
